GO
da-DKkl-GL
MALITTARISASSAT 2019

Sulisitsisut malittarisassai

§ 1
Aqqa najugaalu

Imm. 1

Peqatigiiffiup taaguutigaa:

Sulisitsisut/Grønlands Erhverv. Naalisarlugu GE.

Imm. 2

GE’p/ Sulisitsisut najugaqarfigaa Kommuneqarfik Sermersooq.

Imm. 3

Sulisitsisut, kattuffik namminersortuuvoq politikkikkut aningaasatigullu immikkut ittumik soqutigisanut pituttorsimanngitsuusoq. Siulersuisut aalajangersinnaapput Sulisitsisut sulisitsisut kattuffiinut allanut ilanngussatut ilaasortanngorniarsinnaasoq.

 

§ 2

Siunertaa

Imm. 1

Sulisitsisut siunertaraa nunatsinni sulisitsisut soqutigisaannik sulissussineq isumaginninnerlu - tamatumani ilanngullugit:

 

  • Sulisitsisut kattuffeqarnerat siuarsassallugu nukittorsassalugulu
  • Peqatigiiffiup anguniagai maleruagassallu atuuttut naapertorlugit sulisitsisut ataqatigiinnerat siuarsassallugu nukittorsassallugulu, ilanngullugit peqatigiiffiup ilaasortaasa  akornanni isumaqatigiinngissutaasinnaasunik pinaveersaartitsineq aaqqiagiinngissutaasinnaasunillu qaangiisitsiniarneq.
  • Akissarsianut sulinermilu atukkanut apeqqutini sulisitsisut ataatsimut soqutigisaannik isumaginneqataaneq, kiisalu sulisitsisut akissarsiortullu akornanni isumaqatigiinngissutinik sapinngisamik pinaveersaartitseqataaneq taamaattoqarsimappallu tamatuminnga eqqissisimasumik qaangiisitsiniaqataaneq.
  • Inatsisiliortunut, pisortanut sulisartoqarnikkullu kattuffinnut allanut sulisitsisut soqutigisaannik isumaginninneq, taamaasiornikkut inuussutissarsiortut atugassarisaat siuarsarniarlugit.
  • Pikkorissartitsinikkut, siunnersorteqarnikkut allatigullu qaammarsaanikkut sulisitsisunik pikkorissaanissaq.

 

  • Inuussutissarsiornikkut suliffeqarfinnillu ineriartortitseqataaneq, tamanna pissaaq suleqatissarsiornikkut, ataatsimiittarnikkut il.il. 

§ 3

Sulisitsisut-mut ilaasortaaneq

Imm. 1

Peqatigiiffimmut ilaasortanngorsinnaapput sulifffeqarfiit Kalaallit Nunaanni inuutissarsiornikkut suliaqartut tamarmik. Sulisitsisut-mut ilaasortanngorniarneq pissaaq allakkatigut Sulisitsisut allattoqarfianut nalunaarluni, taassumalu ilaasortaq sumiiffimmi immikkoortoqarfimmi ilaasortatut nalunaarsussavaa, takuulli § 6, imm.2, aamma sammisaqarfiit, § 7-imiittut.

Ilaasortat illoqarfinneersuunngitsut kommuneqarfimmi sumiiffiup peqatigiiffianut sorlermut atassuteqarsinnaanertik namminnneq aalajangissavaat.

Taakku saniatigut suliniaqatigiiffiit nunaqavissut aamma nunanit allaneersut aammalu suliffeqarfiit nunanit allaneersut Sulisitsisut-mut ilanngussatut ilaasortanngorsinnaapput.

Taakku taamaallaat ilaasortatut ilanngussatut kattuffimmut nalunaarsorneqartassapput, Sulisitsisut-mi qinersinerni il.il suniluunniit taasisinnaanatik, taaseqataasinnaanatik aalajangeeqataasinnaanatillu.

Sulisitsisut siulersuisuisa pisortap inassuteqarneratigut ilaasortanngorniarluni, ilaasortatut ilanngussatut ilaasortanngorniarluni qinnuteqartoq imaluunniit ilaasortaanerminik nutarsaaniartoq itigartissinnaavaat, qinnuteqartup Sulisitsisut ilaasortanngornissamut piumasaqaataat naammatsinngippagit imaluunniit malittarisassai imaluunniit malittarisassat malillugit aalajangikkat allat malinngippagit.

Imm. 2

Pissutsit immikkut illuinnartut atuutsillugit inuk sulifffeqarfilluunniit nalinginnaasumik atuuttunit allaanerusunik atugassaqartitaalluni Sulisitsisut-mi ilaasortanngortinneqarsin-naavoq. Ilaasortanngornissamut piumasaqaatit siulittaasoqatigiinnit (siulittaasoq siulittaasullu tullii) aalajangiiffigineqassapput, tamannalu siulersuisut tullianik ataatsimiinneranni inaarutaasumik akuersaagassiaassalluni.

Imm. 3

Sulisitsisut siulersuisui aalajangersinnaapput Sulisitsisut-mi ilaasortanngorniarnermut qinnuteqaat akuerineqassanersoq.

Tamatumunnga atatillugu siulersuisut sumiiffimmi sulifffeqarfiup inissisimaffigisaani immikkoortortaqarfimmit kiisalu sammisaqarfimmit sammisaqarfinnilluunniit, suliffeqarfiup qinnuteqartup attuumassuteqarfigisaanit, oqaaseqaatinik piniarsinnaavoq.

Ilaasortanngornissaq itigartitsissutigineqarpat qinnuteqartup piumasaqaatigisinnaavaa apeqqut tullianik ileqquusumik ataatsimeersuarnissami saqqummiunneqassasoq, qinnuteqaat akuerine-qarsinnaanersoq aalajangigassanngorlugu.

Suliffeqarfiit Suliffeqarfissuarnut atasut pillugit Suliffeqarfissuit Sulisitsisut-mi ilaasortan-ngornissaat pillugu Siulersuisut malittarisassiorsinnaapput, tamakkua ingerlataat Sulisitsisut sammisaqarfiisa iluanniippata.

 

 

§ 4

Ilaasortanngornermut akiliut

Imm. 1

Nutaamik ilaasortanngortut ilaasortanngornermut akiliummik immikkut ittumik akiliuteqassapput.

Imm. 2

Ilaasortat, ilaasortaanermut akiitsoqarnertik pissutigalugu ilaasortaajunnaarsitaasimasut aatsaat ilaasortanngoqqissinnaapput ilaasortaanermut akiitsutik akilerpatigit kiisalu ilaasortanngoqqinnermut immikkut ittumik akileeqqillutik.

Imm. 3

Akiliutissat annertussusissaat aallartitat ataatsimeersuarneranni aalajangersarneqassapput.

 

§ 5

Ilaasortaanermut akiliut

Imm. 1

Ilaasortaanermut akiliutip annertussusissaa aallartitat ataatsimeersuarneranni aalajangersarneqartassaaq ukiut marlukkaarlugit atuuttussatut.

Imm. 2

Siulersuisut aallartitat ataatsimeersuarnerini tamani Sulisitsisut naatsorsuutai missingersuutillu tunngavigalugit ilaasortanut aamma ilaasortatut ilanngussanut ilaasortaanermut akiliutip annertussusissaanik naapertuuttumik siunnersuuteqartassapput.

Imm. 3

Ilaasortaanut ilaasortaanermut akiliut tassaavoq tunngaviusumik ilaasortaanermut akiliut akissarsiarititallu annertussusaat tunngavigalugit akiliut. Ilaasortatut ilanngussanut ilaasortaanermut akiliut tassaavoq tunngaviusumik ilaasortaanermut akiliut. Ilaasortaanermut akiliutit tamarmik kvartalimut kingumoortumik akilerneqartassapput.

Imm. 4

Ilaasortanut tunngaviusumik ilaasortaanermut akiliut ukiukkuutaartumik aalajangersimasumik annertussusilerneqartassaaq, taannalu qaammatisiutit malillugit ukiumi kvartalinut sisamanut agguarneqartassaaq.

Ilaasortatut ilanngussanut ilaasortaanermut akiliut aalajangersimasumik annertussusilerneqassaaq, taannalu qaammatisiutit malillugit ukiumi kvartalinut sisamanut agguarneqassalluni.

Imm. 5

Akissarsiarititat annertussusaat naapertorlugit ilaasortat akiliutaat suliffeqarfiup ukiumi ilaasortaanermut akiliuteqarfiup siuliani aningaasarsiatut A-tut 1 mill. kr.-nik anginerusup nalunaarutigisimasaata procentinngorlugu ilaatut aalajangersarneqartassaaq. Akissarsiarititat annertussusaat naapertorlugit ilaasortat akiliutaasa naatsorsonerisa annerpaaffissaraat 105 million kr., taannalu julip qaammataani atuisartunut akigitinneqartunik nalileeriaaseq atorlugu aaqqinneqartassalluni, siullermik ulloq 1. januar 2019, juli 2017-imiit juli 2018-imut atuisartunut akigitinneqartut qaffariarsimanerat tunngavigalugu.

Imm. 6

Ilaasortat aningaasarsiat A-t nalunaarutigineqarsimasut siuliani pineqartut uppernarsassavaat akileraaruseriffimmut immersukkap Akissarsianut nalunaarutit nuutinneqarnerata nassiunneratigut imaluunniit naatsorsuutit kukkunersiuisumit atsiorneqarsimasut nassiunnerisigut. Uppernarsaat Sulisitsisut allattoqarfianit tiguneqareersimassaaq kingusinnerpaamik ukiup aningaasarsiorfiusup tulliani februarip 15-iani.

Imm. 7

Uppernarsaat imm. 6-imi taaneqartoq imm. 6-imi piumasarineqartutut piffissaagallartillugu tiguneqarsimanngippat Sulisitsisut allattoqarfiata ilaasortaanermut akiliut akissarsiarititanik tunngavilik imm. 5-imi taaneqartoq missingersuilluni annertussusilersinnaavaa.

Missingersuilluni annertussusiliisoqarsimappat uppernarsaat imm. 6-imi taaneqartoq ukiumi ilaasortaanermut akiliuteqarfiusumi februarip 15-iata kingorna nassiunneqarsimagaluarpal-luunniit ilaasortaanermut akiliut minninngorlugu iluarsineqarsinnaanngilaq.

Imm. 8

Ilaasortaanermut akiliut akilerneqartassaaq kvartalit naanerisa tamaasa, tamatumalu kingorna ernialersuisoqalissaaq, takuuk kingusinaartumik akiliinermi il.il. erniat pillugit inatsit.

Imm. 9

Nutaamik ilaasortanngortut qaammatisiutit malillugit kvartali ilaasortanngorfitsik tamakkerlugu akilissavaat kvartalimi qaammatit siulliit 2 ingerlaneranni ilaasortanngorpata. Kingusinnerusukkut ilaasortanngorpata aatsaat kvartalip tullianiit ilaasortaanermut akiliisalissapput.

Imm. 10

Suliffeqarfiit aallarterlaat ukiumi siuliani aningaasarsianik A-nik akissarsiaqartitsisimanngitsut ukiumi ilaasortaanermut akiliuteqarfimmi siullermi akissarsiarititat tunngavigalugit ilaasortaanermut akiliutissaq, taamaattoqassappat, akissarsiarititassatut missingersukkat tunngavigalugit naatsorsorneqassaaq.

Imm. 11

Sulisitsisut siulersuisui aalajangersinnaapput sammisaqarfik ilaasortaanermut akiliuteqassasoq imm. 3-5-imut taaneqartunit allaannerusumik aaqqissuussaasumik.

Imm. 12

Ilaasortaanermut akiliutissap kinguartinneqarnissaa Sulisitsisut pisortaata akuersissutigisinnaavaa.

Imm. 13

Ilaasortaanermut akiliut akilerneqareersimasoq utertinneqarsin-naanngilaq.

Imm. 14

Ilaasortaanermut akiliummut akiitsoqarnerup kingunerissavaa Sulisitsisut iluani qinersinerni, taasinerni, aalajangiinerni il.il. taasisinnaanermik annaasaqarneq, tamatumanissaaq aamma immikkoortortaqarfinni.

Imm. 15

Ilaasortaq ilaasortaanermut akiliutissaminik imm. 3 malillugu kvartalini marlunni amerlanerusuniluunniit kinguaattoorsimappat peqatigiiffimmit ilaasortaajunnaarsinneqassaaq, allakkatigut ilisimatinneqarnerminiit ullut arfineq pingasut qaangiutinnginneranni akiligassaminik akiliisimanngippat.

§ 6

Immikkoortortaqarfiit

Imm. 1

Illoqarfinni tamani tallimanik amerlanerusunilluunniit ilaasortaqartuni Sulisitsisut ataaniittumik immikkoortortaqarfimmik pilersitsisoqassaaq.

Immikkoortortaqarfiit nalinginnaasumik ingerlanneqarnerannut aningaasartuutit Sulisitsisutmit akilerneqartassapput. Tamanna pillugu erseqqinnerusumik malittarisassat siulersuisunit aalajangersarneqassapput.

Imm. 2

Illoqarfinni 5-nik ikinnerusunik ilaasortaqarfiusuni imm. 1 naapertorlugu. Immikkoortor-taqarfinnik pilersitsiso-qassanngilaq Taakkunani Sulisitsisut siulersuisui illoqarfimmi tassani ilaasortat akornanni inummik attaveqarfigisassamik toqqaassapput.

Imm. 3

Immikkoortortaqarfiit arlaliusut aamma/imaluunniit illoqarfinni ilaasortat § 6, imm. 2 naapertorlugu immikkoortortaqarfimmik pilersitsiviusimanngitsuni nunap immikkoortuani immikkoortortaqarfiliorniarlutik ataatsimoorlutik aalajangersinnaavaat. Nunap immikkoor-tuisa immikkoortortaqarfii kattuffimmiit immikkut ittumik tapiiffigineqartassanngillat.

Imm. 4

Sulisitsisut-mi ilaasortat tamarmik immikkoortortaqarfimmi ilaasortaapput, kisiannili takuuk § 6, imm. 2 aamma § 3, imm. 1, oqaaseqatigiit 3, aammalu immikkoortortaqarfimmi ilaasortanngortitsisoqassanngilaq Sulisitsisut-mi ilaasortaanngitsunik.

 

Immikkoortortaqarfinni ilaasortaapput sulifffeqarfiit, illoqarfimmi immikkoortortaqarfiup inissisimaffigisaani ingerlatsisut. Tassa imaappoq, immikkoortortaqarfinnik illoqarfiit amerlaqataattut amerlatigisunik taamaallaat pilersitsisoqarsinnaavoq.

 

Immikkoortortaqarfinni ilaasortaapput sulifffeqarfiit, illoqarfimmi immikkoortortaqarfiup inissisimaffigisaani ingerlatsisut. Tassa imaappoq, immikkoortortaqarfinnik illoqarfiit amerlaqataattut amerlatigisunik taamaallaat pilersitsisoqarsinnaavoq.

 

Taamaasilluni suliffeqarfik immikkoortortaqarfinni arlalinni ilaasortaasutut nalunaarsorsimasinnaavoq, Sulisitsisut-mili ilaasortatut ataasiinnartut nalunaarsorsimassalluni.

Imm. 5

Sulisitsisut siulersuisui immikkoortortaqarfinnut malittarisassanik tunngaviusumik suliarinnissapput. Malittarisassat atuutilersinneqannginnerini Sulisitsisut siulersuisuini akuersissutigineqartussatut nassiunneqassapput.

Imm. 6

Immikkoortortaqarfik immikkoortortaqarfimmi siulersuisunit, immikkoortortaqarfimmi ilaasortanit qinerneqartunit, aqunneqassaaq.

Sumiiffinni peqatigiiffiit aaliangersinnaavaat siulersuisuminni issiasut branchinit assigiinngitsuneersuussasut.

 

Ataatsimeersuarnermut aallartitassanik toqqaanermut atatillugu immikkoortortaqarfiit kommuneqarfinni suleqatigiissapput, takuuk § 8.

 

§ 7

Brancheudvalgit

Imm. 1

Sulisitsisut-mi ilaasortat tamarmik sammisaqarfimmut ilaapput, takuuk § 3, imm. 1. Peqatigiiffimmut ilaasortanngornermi suliffeqarfiup sammisaqarfigisani nalunaassavai, tamatumunngalu atatillugu suliffeqarfiup pingaarnertut sammisaqarfigisamisut pingaarnertut isigisani nalunaarutigissallugu. Tamanna tunngavigalugu suliffeqarfik sammisaqarfiit aalajangersarneqarsimasut ilaannut ataatsimut inissinneqassaaq. Inissinneqarnera siulersuisunit akuersissutigineqassaaq.

Imm. 2

Ukiumi ataatsimeersuarfiunngitsumi qaammammi martsimi, takuuk § 8, imm. 1, suliffeqarfiit sammisaqarfikkaartumik allakkatigut taasinikkut brancheudvalgimik qinersissapput, tallimanik ilaasortalimmik. Branchilli 100-ut sinnerlugit ilaasortallit 7-inik qinersissapput imal. taakku ukiumut ilaasortaanerminnut 4 mill. Kr.-it sinnerlugit akiliisartuutillugit.

Tamatuma saniatigut sammisaqarfiit tamarmik ataatsimiititaliamut sinniisussanik marlunnik qinersissapput.

Brancheudvalginut qinersinerni malittarisassat siulersuisunit aa.aingersarneqarsinnaapput, isumannaarniarlugu, ataatsimiititaliat branchgep iluani sammiviit siammasissumik aallartitaqartiternissaat

Brancheudvalgi inissitsitissaaq  siulittaasulerluni. Brancheudvalgi 7-inik ilaasortaqarpat, taava brancheudvalgi inissititissaaq soiulittaasoqarluni siulittaasumullu tulleqartitsilluni, taakkulu branchit ilui i sammivinnit assigiinngitsuneersuussapput.

Imm. 3

Brancheudvalgit siulersuisunut ulluinnarni aqutsisutut atuutissapput, tassa sammisaqarfinnut tamanut ulluinnarni peqatigiiffeqarnermut politikkimut akisussaasuussagamik. Udvalgi  aalajangiisinnaassuseqarpoq ataatsimiinnermi ilaasortaasut ikinnerpaamik 2/3-ii najuuppata.

Brancheudvalgip siulittaasua sivikinnerpaamik ullunik 14-inik sioqqutsilluni ataatsimiigiaqqusisassaaq.

Brancheudvalgimulli ataatsimiigiaqqusisoqarsinnaavoq tamanna brancheudvalgimi ikinnerpaamik ilaasortat marluk piumasarippassuk.

Brancheudvalgit aalajangiineri pillugit allattuisoqartassaaq brancheudvalgimi ilaasortanit akuersissutigineqartussamik.

 

Brancheudvalgip ingerlaneranut aningaasartuutit nalinginnaasut Sulisitsisut-mit akilerneqartassapput. Tamatumunnga erseqqinnerusumik malittarisassat siulersuisunit aalajangersarneqassapput.

 

§ 8

Ataatsimeersuarneq

Imm. 1

Sulisitsisut ataatsimeersuarnera, ukiuni akunnattuni (2-mik agguarneqarsinnaanngitsuni) qaammammi martsimi ingerlanneqartartoq, peqatigiiffiup Sulisitsisut-mut tunngasuni oqartussaaffittut qullersaraa.

 

Taamaattorli apeqqutit nukingernartuusinnaasut taasisitsinikkut aalajangiiffigineqarsinnaapput, tamanna suliffeqarfiit ilaasortaasut tamarmiusut ikinnerpaamik 25%-iisa piumasarippassuk.

Taamatuttaaq siulersuisut apeqqutit taasisitsinikkut aalajangiiffigitissinnaavaat.

Tamatumunnga malittarisassat erseqqinnerusut siulersuisuni ulluinnarni aqutsisunit aalajangersarneqassapput, takuuk § 9, imm. 5.

Imm. 2

Siulersuisuni siulittaasoq ileqquusumik ataatsimeersuariaqqusissaaq ataatsimeersuarnissaq kingusinnerpaamik qaammammik ataatsimik sioqqullugu.

Suliffeqarfiit ilaasortaasut ataasiakkat tamarmik allakkatigut ataatsimeersuariaqquneqartassapput allakkallu ataatsimeersuariaqqusissutit imaqartassapput siulersuisut oqaluuserisassatut siunnersuutaannik, siulersuisut nalunaarutaannik, ukiumut naatsorsuutinik aammalu oqaluuserisassatut imm. e - g-mi siunnersuutinik, takuuk imm. 4, kiisalu qaqugu sumilu ataatsimeersuarnerup ingerlanneqarnissaanik.

Imm. 3

Ataatsimeersuaqataasussat tassaapput

  • siulersuisunut ilaasortat ataatsimeersuarnermi qinerneqarsimasut, takuuk § 9, imm. 1,
  • brancheudvalgini ilaasortaasut tamarmik,
  • immikkoortortaqarfinni siulittaasut tamarmik taakkualuunniit sinniisussaat kiisalu  Sulisitsisut-mut aallartitat kommunenit sisamanit qinigaasut.

Kommuneniit aallartitat aalajangersimasumik amerlassusillit kommuneqarfimmiit aallartitatut qinigaasinnaapput. Kommuneni ilaasortat 20-t aallartinnerisa tamaasa ataatsimik aallartitaqarsinnaapput. Kommuneqarfinni immikkoortuni siulittaasuusut kommunemi qinikkat amerlassusaannit ilanngaatigineqartassapput. Kommuneni qinigaasut sinneruttut allakkatigut qinersinikkut ukiumi ataatsimeersuarfiusussami qaammammi januarimi qinerneqartassapput.

Kommuneni aallartitatut qinigaasut kommunemi immikkoortortaqarfiup ataffigisaani, immikkoortortaqarfinni ilaasortaasunit aamma taakku akornanniit qinerneqartassapput.

Imm. 4

Ileqquusumik ataatsimeersuarnermi makkua oqaluuserineqartassapput: a) Aqutsisumik qinersineq

  1. Aallartitat peqataasinnaanerannik akuersissutiginninneq aammalu taaseqataasinnaasut amerlassusaannik akuersissutiginninneq
  2. Siulersuisut nalunaarutaat
  3. Ukiumut naatsorsuutit kukkunersiorneqarsimasut akuersissutigineqartussatut saqqummiunneqarnerat
  4. Siulersuisut siunnersuutaat
  5. Brancheudvalgit siunnersuutaat
  6. Ilaasortat siunnersuutaat
  7. Ilaasortaanermut akiliutip kiisalu siulersuisut brancheudvalginilu ilaasortat akissarsiaasa aalajangerneqarnerat missingersuutit saqqummiunneqartut tunngavigalugit
  8. Siulittaasumik qinersineq
  9. Siulersuisunik sinniisussanillu qinersineq, takuuk § 9, imm. 1
  10. Kukkunersiuisumik qinersineq
  11. Tamalaat

Imm. 5

Suliffeqarfiit ilaasortaasut brancheudvalgillu ileqquusumik ataatsimeersuarnermi oqaluuserisassatut siunnersuutaat siulersuisunit tiguneqareersimassapput ukiumi ataatsimeersuarfiusumi kingusinnerpaamik februarip aallaqqaataani.

Imm. 6

Ataatsimeersuarneq aqunneqassaaq aqutsisumit ataatsimeersuartunit qinikkamit, taannalu siulersuisuni ilaasortaassanngilaq.

Imm. 7

Ataatsimeersuarnermi aallartitat tamarmik ataatsimik taasisinnaatitaapput.

Suliffeqarfiit Sulisitsisut-mi ilaasortaasut tamarmik ataatsimeersuarnermi peqataasinnaatitaapput oqaaseqarsinnaatitaallutillu.

Imm. 8

Ataatsimeersuarnermi apeqqutit tamarmik amerlanerussuteqarnikkut aalajangiiffigineqartarput, taamaallaat aalajangiiffigisassat makkua, ataatsimeersuarnermi aallartitanit ikinnerpaamik 3/4-imik amerlanerussuteqarluni aalajangiiffigineqartussaasut pinnagit:

  • Malittarisassat allannguutaat.
  • Ilaasortanik ilaasortaajunnaarsitsineq.

Imm. 9

Ataatsimeersuarnermi aallartitat ikinnerpaamik pingasut piumasarippassuk taasineq allakkatigut ingerlanneqassaaq.

Imm. 10

Siulersuisut pisariaqarsorippassuk, imaluunniit suliffeqarfiit ilaasortaasut tamarmiusut ikinnerpaamik 25%-iisa imaluunniit brancheudvalgini ilaasortaasut tamarmiusut ikinnerpaamik 50%-iisa tamanna siulersuisunut allakkatigut kissaatigippassuk, immikkut ittumik ataatsimeersuartoqassaaq. Qinnuteqaatip tiguneraniit kingusinnerpaamik qaammat ataaseq qaangiutsinnagu siulersuisut immikkut ittumik ataatsimeersuariaqqusissapput sivikinnerpaamik qaammammik ataatsimik piffissaliillutik, oqaluuserineqartussat nalunaarutigalugit.

Imm. 11

GEp ataatsimeersuarnermi aallartitatut peqataasussat amningaasartuuttaat, angalanernut akunnittarfimmilu najugaqarnermut, akilertassavai.

 

§ 9

Siulersuisut

Imm. 1

Sulisitsisut siulersuisunit aqunneqarpoq, tassaasunit ataatsimeersuarnermi siulittaasoq qinigaasoq kiisalu brancheudvalgini ataasiakkaani siulittaasut tullii aammalu kommunini tamanit toqqagaasut kiisalu allartitaq, Dskomiit Tasiilap tungaanut aallartitatut toqqagaasoq. Allartitat avannaaniit tunumut siinniisaasussaq aallartitanit avannaanersunit tunumeersunillu qinerneqassaaq. Sinniisaasut taakku tallimaasut kommuneni ilaasortaasunit qinigassanngortin-neqarlutik qinerneqartassapput.

Nunap immikkoortortaani Diskomiit Tasiilamut siniisussaq ataaseq. Avannaata Kommunianiit sinniisussaq ataaseq. Kommuneqarfik Qeqertalimmiit sinniisussaq ataaseq. Qeqqata Kommunianit siniissussaq ataaseq.

Kommuneqarfik Sermersuumit kitaaneersumik sinniisussaq ataaseq.

Kommune Kujallermit sinniisussaq ataaseq.  

Kommunenit tamarmik ataatsimik sinniisussamik qinersisassapput, taannalu siulersuisunut ilaasortanngussaaq qinigaasoq qinigaaffiup ingerlanerani siulersuisunit tunuarpat.

Siulersuisut inissitsitissapput siulittaasup tulliinik talliamnik kommuninit ataasiakkaaneersunik inissiillutik. Siulittaasoqarfimmi issiassapput siulittaasoq siulittaasullu tullii tallimaasut.  

Siulersuisut peqatigiiffeqarnermi politikkimi oqartussaasutut akisussaasuupput minnerpaamillu ukiumut marloriarlutik ataatsimiittassallutik.

Siulittaasoq ataatsimiigiaqqusisassaaq sivikinnerpaamik sap. akunnerinik pingasunik piffissaliilluni.

Siulersuisut telefonikkut ataatsimiittarsinnaapput.

Siulersuisut sulinerat Sulisitsisut-mut ilaasortaanermut akiliutinit akilerneqar tassapput.

Imm. 2

Qinigaaffiup ingerlanerani siulittaasoq tunuarpat siulittaasup tullia nutaatut siulittaasunngussaaq tulliani ileqquusumik ataatsimeersuarnissap tungaanut. Imm. 1-imi aalajangersakkat malillugit siulersuisut siulittaasup tullissaanik nutaamik qinersissapput siulersuisuni ilaasortat akornanni.

Imm. 3

Siulersuisut immikkut ittumik ataatsimiittarsinnaapput tamanna siulittaasup piumasarippagu imaluunniit siulersuisuni ilaasortat ikinnerpaamik pingasut piumasarippassuk. 

Ataatsimiigiaqqusisoqartassaaq nalinginnaasumik siulersuisunik ataatsimiigiaqqusisarnertut.

Imm. 4

Siulersuisut aalajangiussaat allattorneqartassapput, taakkulu siulersuisunit akuersissutigineqartassapput.

Imm. 5

Siulersuisut ingerlariaasissartik namminneq aalajangersartassavaat malittarisassat makkua naapertorlugit.

Imm. 6

Siulersuisut aalajangiisinnaassuseqarput siulersuisuni ilaasortat ikinnerpaamik 2/3-ii ataatsimiinnermi najuuppata.

 

§ 10

Oqartussaaffiit agguataarneri

Imm. 1

Peqatigiiffiup ulluinnarni allaffitsigut aqunneqarnera ingerlatseriaasissatut siulersuisut aalajangersagaat tunngavigalugit ingerlanneqartarpoq, pisortamit siulersuisunit atorfinitsinneqartumit aqunneqarluni.

Pisortaq toqqaannartumik siulersuisut ataanni inissisimavoq.

Pisortap atorfeqarnermini atugassarisai erseqqinnerusut, suliassai oqartussaaffeqarfiilu pisortatut isumaqatigiissummi siulersuisunit suliarineqarsimasumi aalajangersarneqassapput.

Pisortap siulersuisut isumasioqatigereerlugit brancheudvalginillu inassuteqareernikkut Sulisitsisut sulisartoqarnikkut isumaqatigiinniarneri isumagisassavai. Brancheudvalgit ataasiakkaat sulisartoqarnikkut isumaqatigiinniarnernut atatillugu isumaqatigiinniarnermut peqataatitassaminnik ataatsimik toqqaanissaminnut periarfissaqarput.

Isumaqatigiissutit tamatigut isumaqatigiissutigineqartassapput Sulisitsisut siulersuisuisa akuersissuteqarnissaat apeqqutaatillugu.

Imm. 2

Sulisitsisut ulluinnarni suliassai allatseqarfiup isumagisassavai. Tamatuma saniatigut allatseqarfiup isumagisassavai siulersuisut brancheudvalgillu sinnerlugit allaffeqarnikkut suliassat.

Allatseqarfik pisortamit aqunneqassaaq.

Imm. 3

Branceudvalgit sammisaqarfinnut tamanut peqatigiiffeqarnikkut politikki akisussaaffigaat.

Peqatigiiffeqarnikkut politikkimi siulersuisut aalajangigaat brancheudvalgit atuuttussanngortittarpaat.

Brancheudvalgit ulluinnarni ingerlatseriaasissartik ingerlatassatillu namminneq aalajangersartassavaat, Sulisitsisut-lli politikkianit aammalu Sulisitsisut siulersuisuisa brancheudvalginut ataasiakkaanut missingersuutinut aalajangersagaannit qilersorsimallutik, siulersuisunillu peqquneqarunik imaluunniit inanneqarunik tamakkua malittassallugit.

Ingerlanniakkatut pilersaarutinik Sulisitsisut siulersuisui ilisimatinneqartassapput, tamakkua aallartinneqannginnerini. Suliniutit annertuut pingaarutillillu siulersuisunit akuersissutigineqartassapput, tamannalu ilaatigut pisinnaavoq brancheudvalgit ataatsimiinnerisa imaqarniliornerinik siulersuisunut tunniussinikkut.

Brancheudvalgip aalajangiineri udvalgimi ilaasortamit kimilluunniit piumasarineqarsinnaavoq Sulisitsisut siulersuisuinut saqummiunneqarnissaat.

Imm. 4

Siulersuisut peqatigiiffiup politikkianut qullersaallutik akisussaapput peqatigiiffiullu pingaarnertut poltikkianik anguniagaanillu, ileqqorissaarnikkut najoqqutassat ilanngullugit,  maleruagassiussallutik.

Imm. 5

Qitiusumik ilinniarfinni ataatsimiitaliat akimorlugit klubbiliornissaq siulersuisut aalajangiiffigisinnaavaat. Aningaasartuutit klubbini suleqataanermut tunngasut klubbini ilaasortanit aningaasaliiffigineqartassapput.

Imm. 6

Immikkut illuinnartunik pissutissaqartillugu pissutsini kinguartinneqarsinnaanngitsuni siulittaasoq aalajangiisinnaavoq.

Tamatuma kingorna aalajangiineq piaarnerpaamik siulersuisunut akuersissutigineqartussatut saqqummiunneqassaaq.

 

§ 11

Naatsorsuutit

Imm. 1

Sulisitsisut naatsorsuutaasa qaammatisiutit malillugit ukioq malippaat.

Imm. 2

Sulisitsisut naatsorsuutai kukkunersiuisumit naalagaaffimmit akunerisaasumit ataatsimeersuarnermilu qinigaasimasumit kukkunersiorneqartassapput.

 

§ 12

Sinniisuuneq akisussaaffiligaanerlu

Imm.  1
Sulisitsisut pisussaaffii taamaallaat Sulisitsisut aningaasaataanit aningaasalersorneqassapput.

Imm. 2

Sulisitsisut siulittaasumit siulittaasullu tullianit ataatsimit peqatigiillutik atsiornerisigut avammut akisussaaffilerneqartarpoq.

Siulersuisut nalunaarutigisinnaavaat killilimmik sinniisussatut piginnaatitsineq inummit ataatsimit amerlanerusunilluunniit isumagineqassanersoq.

Imm. 3

Pigisanik aalaakkaasunik tunisinermi, pisinermi qularnaveeqqusiussinermiluunniit aammattaaq pisariaqarpoq siulersuisut aalajangiinissaat aammalu siulittaasup siulittaasullu tulliata ataatsip peqatigiillutik atsiornissaat.

 

§ 13

Pisortanik soqutigisaqaqatigiillu kattuffiinik isumaqatigiissutit

Imm. 1

Sulisitsisut siulersuisui aammalu qitiusumik ilinniarfinni ataatsimiitaliat pisortanik sulisartullu kattuffiinik isumaqatigiinniarnissamut pisinnaatitaapput, takuuk § 10.

Imm. 2

Branchudvalgini ataasiakkaani ilaasortat ikinnerpaamik marluk imaluunniit siulersuisuni ilaasortat ikinnerpaamik pingasut tamanna piumasarippassuk isumaqatigiissutit taamaattut attuuttussanngortinneqannginneranni suliffeqarfinnut Sulisitsisut-mi ilaasortanut taasissutigineqaqqaarsinnaapput.

Imm. 3

Taasinerup inernera nalinginnaasumik amerlanerussuteqarnikkut aalajangiiffigineqassaaq.

Imm. 4

Isumaqatigiissutit § 10 aamma 13 malillugit naammassineqarsimasut ilaasortanit malinneqartussaapput.

 

§ 14

Sulisitsisut malittarisassaanik aalajangigaanillu il.il. eqqortitsineq

Imm. 1

Suliffeqarfiit Sulisitsisut-mi ilaasortaasut pisussaapput Sulisitsisut inatsisaanik, ileqqorissaarnikkut najoqqutassanik aalajangersagaanillu il.il. eqqortitsinissaminnut, sulisartoqarnikkullu isumaqatigiissutinik, Sulisitsisut sulisartullu kattuffiisa akornanni isumaqatigiissutigineqarsimasunik kiisalu ataatsimeersuarnermi aalajangiussanik siulersuisullu peqqussutaannik eqquutsitseqqissaarnissaminnut.

Suliffeqarfiit Sulisitsisut-mi ilaasortaasut pisussaapput kisitsisitigut misissuinernut atatillugu allatseqarfiup saaffiginnissutaanik tamanik akissuteqarnissaminnut.

Imm. 2

Imm. 1 malillugu pisussaaffinnik unioqqutitsineq piumasaqaateqarnermik, sioorasaarsinermik, pillaatigalugu akiliisitsinermik ilaasortaajunnaarsitaanermillu kinguneqassaaq. Akiliisitsissutip annertussusissaa siulittaasumit aalajangerneqassaaq taannalu annerpaamik ilaasortap akissarsiarititaata 1 procentianik annertussuseqassaaq, minnerpaamillu 500 kr.-imik.

§ 15

Ilaasortaajunnaarneq ilaasortaajunnaarsitaanerlu

Imm. 1

Sulisitsisut-mit ilaasortaajunnaarneq taamaallaat pisinnaavoq januarip aallaqqaataani  aamma julip aallaqqaataani. Ilaasortaajunnaarneq allakkatigut nalunaarutigineqassaaq allatseqarfimmillu tiguneqareersimassalluni ilaasortaajunnaarnissap atuutilerfissaa kingusinnerpaamik qaammatinik pingasunik sioqqullugu.

Imm. 2

Ilaasortarli suliffimminik ingerlatsiunnaarsimappat erniinnartumik Sulisitsisut-mit ilaasortaajunnaartoqarsinnaavoq. Ilaasortaanermut akiliut ilaasortaajunnaarnerup nalaani akiligassiissutigineqareersoq utertinneqarsinnaanngilaq.

Imm. 3

Suliffeqarfik ilaasortaasoq akiliisinnaajunnaartutut (akiitsoqarpallaartutut) suliarineqalerpat imaluunniit akilersuinerminik unitsitsisimappat Sulisitsisut-mit paasineqarneraniit erniinnartumik ilaasortaajunnaarsitaassaaq, akiliisinnaajunnaarnermik

(akiitsoqarpallaarnermik) imaluunniit akilersuinermik unitsitsinermik ingerlatsisup ilaasortaaginnarnissaq kissaatiginngippagu. Ilaasortaanermut akiliut ilaasortaajunnaarnerup nalaani akiligassiissutigineqareersoq utertinneqarsinnaanngilaq.

Imm. 4

Sulisitsisut malittarisassai imaluunniit malittarisassat naapertorlugit aalajangiinerit allat ilaasortap eqqortinngippagit siulersuisut ilaasortaq ilaasortaajunnaarsilersaarlugu allaffigeernerata kingorna, tamatumunngalu oqaaseqarnissaanik qinnuigeernerata kingorna, ilaasortaq ilaasortaajunnaarsissinnaavaat.

Ilaasortaajunnaarsitsineq, takuuk § 5, imm. 15, ilaasortaajunnaarsitaanermik aalajangersakkamut ilaanngilaq.

Imm. 5

Ilaasortaajunnaarsitsinermik aalajangerneq siulersuisuni ilaasortat tamarmiullutik atsiortussaavaat.

Imm. 6

Ilaasortaajunnaarsitsinissamik aalajangertoqarsinnaanngilaq ilaasortaq allakkatigut tammatsaalisakkut qaammat ataaseq qaangiutsinnagu oqaaseqaateqarnissaminik kajumissaarneqarsimatinnagu.

Imm. 7

Siulersuisut ilaasortaajunnaarsitsinissamik aalajangernerat ingerlaannaq atuutilissaaq, ataatsimeersuarnermi allanngortinneqarsinnaanerata tungaanut, takuuk imm. 8.

Imm. 8

Ilaasortaajunnaarsitsinissamik aalajangernerit tamarmik ataatsimeersuarnermi tulliuttumi saqqummiunneqartassapput, ilaasortaajunnaarsitsinermillu aalajangerneq atuuttussanngortinneqassaaq § 8, imm. 8-mi aalajangersakkat naapertorlugit.
 

§ 16

Peqatigiiffimmik atorunnaarsitsineq

Imm. 1

Peqatigiiffiup atorunnaarnissaa taamaallaat ataatsimeersuarnermi aalajangiunneqarsinnaavoq, ataatsimeersuariaqqusissummi allassimassalluni peqatigiiffiup atorunnaarsinneqarnissaa ataatsimeersuarnermi oqaluuserineqassasoq, aammalu Sulisitsisut-mi ilaasortat ikinnerpaamik

3/4-iisa allakkatigut qinnutigisimappassuk peqatigiiffiup atorunnaarsinneqarnissaa siunertaralugu ataatsimeersuaqqusinissaq ataatsimeersuaqataasussallu ikinnerpaamik 3/4-ii najuuppata.

Aalajangerneq akuersissutigineqassaaq ataatsimeersuartut ikinnerpaamik 3/4-ii akuersillutik taasippata.

Imm. 2

Ataatsimeersuaqataasussat 3/4-iinik ikinnerusut najuuppata ataatsimeersuarnermi aalajangerneqarsinnaavoq nutaamik ataatsimeersuartoqarnissaa sivikinnerpaamik sap. akunnerinik sisamanik sivisunerpaamillu sap. akunnerinik arfinilinnik  piffissaliussilluni, peqatigiiffiullu atorunnaarsinneqarnissaa kisiat oqaluuserisassaatillugu.

Ataatsimeersuarnermi peqatigiiffiup atorunnaarsinneqarnissaa akuersissutigineqarsinnaavoq ataatsimeersuaqataasut 3/4-ii akuersippata, ataatsimeersuaqataasut qanorluunniit amerlatigigaluarpata.

Imm. 3

Peqatigiiffiup atorunnaarsinnissaanik siunnersuummut peqatigiiffiup aningaasaataasa sumut atorneqarnissaat ilanngullugu siunnersuutigineqassaaq.

 

Taamaasillutik akuersissutigineqarput 23. marts 2019-imi aallartitat ileqquusumik Nuummi ataatsimeersuarneranni.